Billboard [news]
Update
07. april 2006 20:17 +0200 GMT
|
Musikalsk fyrverkeri i Førde 3.-6. juli 2003 Pressemelding 13. mars 2003 |
 |
Europeiske stemmer
er valt som tema for årets festival, og med 17 grupper frå 16 europeiske land
får vi til fulle presentert det musikalske mangfaldet som finst i Europa. Her
blir det både tradisjonell folkemusikk, musikalske uttrykk som ligg i grenseland
til andre sjangrar og musikk skapt i ein smeltedigel av mange stilar og
tradisjonar. At europeisk musikk står i sentrum på denne festivalen, er ein
direkte følgje av at European Broadcasting Union har valgt festivalen i Førde
som vertskap for sin 24. EBU-festival for folkemusikk.
EBU-programmet byr mellom anna på forfriskande felemusikk
med Norges nye folkemusikkstjerner Majorstuen,
spansk-arabiske tradisjonar med Aljub, gamle balladar frå Ukraina med Vasyl
Nechepa, Balkanrytmar med Duo Rapsozii Botosanilor frå Romania, Brina &
String.si frå Slovenia og Marusic IsTrio frå Kroatia. Frå Polen kjem unge og
svingande Swoja Droga og frå Belgia kjem ”partybandet” Jaune Toujours. I tillegg
står artistar frå Danmark, Sverige, Finland, Russland, Tsjekkia, Kvite-Russland,
Tyskland og Latvia på EBU-programmet. Mange av dei opptrer også ved andre høve
under festivalen i eit program som er meir innhaldsrikt enn nokon gong!
Verda kjem til Førde
Musikk frå fire verdsdelar i Førde. Ingen annan stad i Norge kan du oppleve så
mange musikkulturar ”på eitt brett”! Frå Argentina: Gustavo Gancedo Tango
Septeto, songaren Debora Russ og to dansepar med sensuell og elegant argentinsk
tango. Frå Burkina Faso: Badenya les Frères Coulibaly, eit fyrverkeri av ei
perkusjonsgruppe med djember, ballafonar, song og dans. Frå Madagaskar: Senge –
mannleg vokalgruppe med fleirstemt song til å få gåsehud av. Frå Afghanistan:
Ensemble Kabul med melodiøse songar og rytmiske dansetonar frå ein urgammal
musikktradisjon. Frå Sri Lanka: Thaa Drum Orchestra som samlar tamilske og
singalesiske musikarar i eit unikt samarbeid, med perkusjonsinstrument og
danseakrobatikk du truleg aldri før har opplevd! Og årets Talentprosjekt samlar
musikarar frå Kina, Mali - og Førde!
Keltisk søndag
På søndagen står det keltiske i fokus med tre konsertar av framståande artistar
frå England, Skotland og øyane rundt. Gled deg til virtuosen Kathryn Tickell som
spelar Northumbrian pipes som ein gud og har med seg ei samspelt gruppe
musikarar. Shine har eit sart uttrykk med vakker song og keltisk harpespel, og
sist men ikkje minst, Blazin’ fiddles med Catriona MacDonald spelar reels og
jigs så det luktar svidd!
Dei keltiske artistane er støtta av Nordisk Ministerråd.
Norway Now!
I konsertserien NORWAY NOW har vi fokus på nye vibrasjonar innan norsk
folkemusikk, og i år presenterer vi ein av dei nye kometane, Jan Beitohagen
Granli frå Valdres. Personleg stil. Engasjert, energisk og kraftfullt
hardingfelespel. Dei unge musikararne i trioen
Flukt med felespelaren Sturla Eide Sundli i spissen er inspirert både av norsk,
irsk og balkansk folkemusikk, og appellerer til eit ungt og nytt publikum.
I møtet med gruppa Trispann får du vare, morosame, religiøse, og drivande
folketonar – som reine vokalarangement eller med instrumentakkompagnement. Per
Sæmund Bjørkum og medmusikarane Tone Hulbækmo, Kåre Nordstoga og Bjørn Kjellemyr
vart tildelt Spellemannprisen 2002 for utgjevinga Berg og vatn, og står for
årets kyrkjekonsert.
Også i år står festivalen for ein ny produksjon i samarbeid med Sogn og Fjordane
Teater; danse-forestillinga Den som rulla’ ette’ golvé samlar 12 av dei beste
dansarane og dansespele-mennene Norge kan by på, m.a. Martin Myhr, Gunnlaug Lien
Myhr, Geir Helge Espeseth, Øystein Romtveit, Hæge Manheim, Egil Syversbråten og
Vidar Underseth.
I seine kveldstimar kan du svinge deg i dansen til drivande dansemusikk av m.a.
Vågå spelemanns-lag, Nordafjells og Indre Sunnfjord spelemannslag. Du kan nyte
ein time med den profilerte songaren Unni Løvlid, eller vitje folkemusikklubben
Columbi Egg der vert og musikar Gabriel Fliflet byr på variert program og
musikalske overraskingar. På festivalen møter du òg Tellef Kvifte, Ole Hamre,
Sigrid Moldestad, Steinar Ofsdal og endå fleire!
Førde Internasjonale Folkemusikkfestival er Norges største fleirkulturelle
musikkarrangement. Festivalen er i år vertskap for den 24. EBU-festivalen for
folk & trad. musikk. 240 artistar frå 25 land og 4 verdsdelar er engasjert til
årets festival som byr på fleire artistgrupper og fleire konsertar enn nokon
gong. Over 80 store og små programpunkt går av stabelen dei fire hektiske
festival-dagane første helga i juli.
Kontaktpersonar:
Dagleg leiar Hilde Bjørkum tlf. 5772 1940 mob. 9091 9933,
e-post:
Informasjonsmedarbeidar Torill G. Faleide tlf. 5772 1940 mob. 9073 8527, e-post:
Her ligg programmet for
heile festivalen
Foto på ein del av artistane finn du
her